Kryeministri Edi Rama, në episodin e radhës të podcastit “Flasim”, ka komentuar raportin mbi pasqyrimin e politikës në mediat shqiptare, duke deklaruar se opozita dominon hapësirën mediatike në vend.
Sipas Ramës, një analizë e realizuar nga një startup shqiptar me inteligjencë artificiale tregon se rreth 60% e kohës televizive në Shqipëri i kushtohet opozitës dhe qëndrimeve antiqeveritare. Ai theksoi se një pjesë e mediave paraqiten të balancuara, ndërsa një përqindje shumë e vogël rezulton pro qeverisë.
Kreu i qeverisë hodhi poshtë pretendimet për media të kapura, duke u shprehur se realiteti në Shqipëri dëshmon të kundërtën. Sipas tij, fakti që mediat dhe portalet online kritikojnë qeverinë tregon se ekziston liri e shprehjes dhe mungesë kontrolli politik mbi to.
“Çdo përpjekje për të kapur mediat është një përpjekje që nuk të çon në fitoren e zemrave dhe të mendjeve të njerëzve”, u shpreh Rama, teksa shtoi se opozita, sipas tij, po përballet edhe me mungesë lidershipi.
