Qeveria miratoi në mbledhjen e 6 shkurtit paketën e vendimeve për indeksimin me 2.5% të pagave dhe elementeve përbërëse të tyre për disa kategori të administratës publike për vitin 2026. Vendimet përfshijnë rritjen e pagës së Presidentit, pagës referuese për sistemin gjyqësor dhe prokurorinë, si dhe përditësimin e strukturave të pagave për Gardën e Republikës, Policinë e Burgjeve, koordinatorët kundër korrupsionit, punonjësit mbështetës, specialitetet në administratë dhe personelin shëndetësor. Efektet financiare do të përballohen nga buxheti i vitit 2026 dhe do të aplikohen nga 1 janari 2026, pas botimit në Fletoren Zyrtare.
Në të njëjtën mbledhje u miratua edhe projektligji për dhënien e amnistisë, i cili synon përjashtimin e plotë ose të pjesshëm nga vuajtja e dënimit dhe ndjekja penale për personat që plotësojnë kriteret ligjore. Ligji bazohet në parimet e humanizmit, rehabilitimit, rrezikshmërisë së ulët shoqërore, mbrojtjes së interesit publik, si dhe integrimit më të lehtë të të miturve dhe grave, duke synuar edhe rritjen e eficiencës në sistemin e drejtësisë dhe mbrojtjen e interesit më të lartë të fëmijës.
Këshilli i Ministrave miratoi gjithashtu disa ndryshime në administratën shtetërore. Dashnor Sula u emërua Inspektor i Përgjithshëm i Inspektoratit të Përgjithshëm, Afrim Qendro u lirua nga detyra e prefektit të Qarkut Tiranë, ndërsa Shkëlqim Hajdari u emërua në këtë detyrë.
