Kuvendi rrëzoi kërkesën e SPAK për dhënien e autorizimit për arrestimin e ish-zëvendëskryeministres Belinda Balluku. Me 82 vota pro dhe 42 kundër, shumica socialiste vendosi të mos ia dorëzojë drejtësisë deputeten socialiste.
Në Komisionin përkatës, Partia Socialiste dhe Partia Demokratike dolën me dy raporte të ndara lidhur me kërkesën e prokurorisë. Gjatë seancës plenare, deputetët e opozitës bllokuan foltoren e Kuvendit dhe nuk lejuan zhvillimin e diskutimeve, duke protestuar kundër vendimit për mos heqjen e imunitetit të Ballukut.
Për shkak të tensioneve në sallë, me propozim të Taulant Balla, diskutimet u ndërprenë dhe Kuvendi kaloi direkt në votimin e projektligjeve të parashikuara në rendin e ditës.
Nga radhët e socialistëve mungonin Fatmir Xhafaj, Elisa Spiropali dhe Blendi Gonxhja. Sipas informacioneve, vetëm Gonxhja e kishte mungesën me arsye, pasi ndodhet në një udhëtim pune jashtë vendit.
Për të arritur në 82 vota pro, socialistëve iu bashkuan edhe tre deputetë nga partia e Tom Doshit.
Ndërkohë, jashtë godinës së Kuvendit, mbështetës të Partia Demokratike po protestojnë kundër vendimit të shumicës.
