Burime nga mazhoranca konfirmojnë se Partia Socialiste nuk do të pranojë formulën e propozuar nga Partia Demokratike për zgjedhjen e Avokatit të Popullit. Sipas të njëjtave burime, kandidatët që kanë mbledhur firmat e nevojshme do të kalojnë për votim në seancë plenare, pa u filtruar paraprakisht nga opozita.
PS nënvizon se zgjedhja e Avokatit të Popullit do të kryhet brenda muajit dhjetor, pasi procesi është pjesë e detyrimeve që burojnë nga Bashkimi Europian.
Një ditë më parë, kreu i grupit parlamentar Taulant Balla deklaroi se PS është tërhequr nga çdo propozim për kandidatura dhe se do të pranojë kandidatët e paraqitur nga opozita. Menjëherë pas kësaj, Gazment Bardhi, homologu i tij demokrat, dorëzoi një dokument ku propozonte që opozita të përzgjidhte 6 kandidatë, ndërsa mazhoranca të zgjidhte 3 prej tyre.
Pavarësisht skemës së Bardhit, mazhoranca konfirmon se do të vazhdojë me procesin sipas rregullores aktuale dhe me listën e kandidatëve të dorëzuar në Kuvend.
