Ndonëse me shumë vonesë dhe me gjasë i imponuar në kuadër të negociatave për anëtarësimin në BE, në ambientin politik shqiptar ka nisur puna për rikthimin e Referendumeve. Por duket se edhe ky ligj nuk do të gjej konsensusin e të gjitha palëve, duke qenë se përfshihet në përplasjen e zakonshme mes dy partive kryesore.
Kryetari i Grupit Parlamentar të PS, Taulant Balla, njoftoi në një konferencë për mediat se PS ka gati draftin e ligjit për referendumet, i cili do të kalojë për konsultim para se të depozitohet në Kuvend.
Balla theksoi se për të ulur kostot, referendumi mund të mbahet paralelisht me zgjedhjet politike apo vendore, por kjo do të diskutohet më tej pasi ka qëndrime të ndryshme. Ai shtoi se Kushtetuta e Shqipërisë nuk e ndalon që ditën e zgjedhjeve të zhvillohet një referendum.
“Grupi parlamentar i PS do të zhvillojë disa tryeza të mëdha konsultative që drafti, edhe pasi të hyjë në procedurë në Kuvend, të jetë rezultat i një procesi të gjerë dhe gjithëpërfshirës”, tha Balla.
Nga ana tjetër, Sali Berisha, deklaroi se PD do të votojë kundër draftit të PS. Ai tha se Rama nuk pranon një produkt të përbashkët dhe theksoi se PD është fokusuar aktualisht në reformat territoriale dhe zgjedhore.
“Jo se besojmë se Edi Rama do të pranojë një produkt të përbashkët, por kemi një opinion të tërë që kërkon të paraqesim variantin tonë. Por të votojmë ligjet e PS në mënyrë të njëanshme, kjo s’ndodh”, deklaroi Berisha.
Kujtojmë se Shqipëria është një nga vendet e pakta që nuk ka një mekanizëm specifik që lejon ushtrimin e demokracisë direkte. Kjo për shkak të mungesës së vullnetit nga ana e partive politike për të lënë në duart e qytetarëve instrumentin që do të shërbente për kontrollin ose balancën e pushtetit.
