Ashtu siç e kishte paralajmëruar, Partia Socialiste nuk do të ‘tolerojë’ bojkotin e PD ndaj Komisionit për Reformën Territoriale. Socialistët sot kanë kërkuar ndryshime në përbërjen e këtij komisioni, me argumentin për të lehtësuar zhvillimin e punimeve.
Në një shkresë drejtuar Kuvendit, socialistët kërkojnë që të hiqet barazia e anëtarëve dhe koncepti i bashkëkryetarit, duke propozuar që mazhoranca të ketë shumicën dhe drejtimin e komisionit.
Sipas propozimit, numri total i anëtarëve do të rritet në 19, me 9 përfaqësues nga radhët e Partisë Socialiste (nga 8 aktualisht), 6 nga Partia Demokratike, 1 nga Grupi Parlamentar Aleanca për Ndryshim dhe 1 nga Partia e Lirisë.
Dokumenti tregon se që nga krijimi i komisionit më 27 tetor 2025 janë mbajtur katër mbledhje zyrtare. Vetëm mbledhja e 27 nëntorit 2025 është zhvilluar me pjesëmarrjen e plotë të të gjithë anëtarëve, ndërsa në mbledhjet e datave 17 dhjetor 2025 dhe 22 janar 2026 opozita nuk ka marrë pjesë, duke penguar zhvillimin normal të punimeve.
