Të hënën në orën 09:30, Sekretariati i Etikës do të shqyrtojë kërkesën e paraqitur nga 14 deputetë të Partisë Socialiste për përjashtimin për 30 ditë nga punimet parlamentare të kreut të grupit parlamentar të PD-së, Gazmend Bardhi.
Shumica socialiste argumenton se Bardhi ka shkelur në mënyrë të përsëritur rregulloren e Kuvendit gjatë seancës plenare të së enjtes, duke ndërprerë folësit dhe fyer kryetarin e Kuvendit.
Kjo është hera e dytë që mazhoranca ndërmerr masa disiplinore ndaj Bardhit gjatë kësaj legjislature.
Kujtojmë se në seancën e fundit Bardhi pati përplasjen e radhës me kreun e Kuvendit, Niko Peleshi për mënyrën se si ky i fundit drejtonte seancën. Kreu i grupit parlamentar të PD kërkonte që deputetëve demokratë t’u jepej e drejta që t’i drejtonin pyetje Komisionerit për Mbrojtjen nga Diskriminimi, Robert Gajda. Por Peleshi nuk ishte dakord, gjë që nervozoi Bardhin dhe iu drejtua me fjalët “je i paaftë”.
