Partia Socialiste ka humbur mazhorancën në seancën e sotme parlamentare, pasi nuk arriti të sigurojë 71 vota për miratimin e projektvendimeve.
Kryetari i Kuvendit, Niko Peleshi, tentoi të anulojë votimin me argumentin se ishte bërë një gabim procedural, ndërsa opozita këmbënguli se ndërprerja erdhi sepse PS nuk i kishte votat e nevojshme.
Nga leximi i emrave të deputetëve socialistë të pranishëm në sallë rezultoi se ishin vetëm 67 deputetë, ndërsa 18 të tjerë mungonin, mes tyre kryeministri Edi Rama dhe disa ministra.
Pas debateve, kryetari i grupit parlamentar të PS-së, Taulant Balla, kërkoi disa minuta pushim.
Në debat, Balla u shpreh se mazhoranca ishte informuar se opozita ishte tërhequr nga të gjitha nismat, por sipas tij “Blushi na informon se nuk është tërhequr nga nismat”, duke kërkuar sqarim nga kryetari i Kuvendit.
Peleshi deklaroi se bëhej fjalë për një “gabim” dhe sqaroi se projektvendimet votohen në fund, pasi të diskutohen projektligjet. Sipas tij, projektligjet e tërhequra nuk janë tre, por dy, ndërsa projektligji “për një shtesë në ligjin për tatimin e vlerës së shtuar të ndryshuar” nuk është tërhequr. Ai shtoi se projektvendimet do të votohen pasi të përfundojë diskutimi i projektligjeve dhe se “do korrektohet ky gabim”.
