Partia Socialiste ka bojkotuar mbledhjen e Këshillit të Mandateve dhe Imunitetit e cila ishte thirrur nga anëtarët e PD. Në një komunikim për gazetarët, kryetari i grupit parlamentar të PD, Gazment Bardhi tha se afati 3 javë për t’i dhënë kohë zëvendëskryemnistres ka skaduar.
Sipas tij, kryetari i Kuvendit, Niko Peleshi duhet të sqarojë se përse nuk po e mbledh Këshillin me qëllim shqyrtimin e kërkesës së SPAK për të hequr mandatin e Ballukut.
“Me përgjegjshmëri të plotë që na dikton situatë dhe si anëtarë të këshillit të mandateve, 5 anëtarët të këtij këshilli kërkuan mbledhjen e këshillit për të vijuar kërkesën e SPAK për heqjen e imunitetit të Belinda Ballukut. Kërkesa jonë është e bazuar në rregulloren e Kuvendit që do të duhet të jetë i vetmi dokument ligjor. Kryetari ka për detyrë të njoftojë mbledhjen e Këshillit dhe rendin e ditës. Sot mbushen tre javë kur SPAK ka kërkuar lejimin e arrestimit të Ballukut dhe po sot mbushen 3 javë kur anëtaret e PS fshihen si ata që kanë shkelur ligjin. Ky është një akt i paprecedent, ku këshilli merr 3 javë kohë për të shqyrtuar një kërkesë”, tha ai.
Bardhi gjithashtu tha se PD po përgatit një kallëzim penal për shpërdorim detyre për kryetarin e Kuvendit, Niko Peleshi. Sipas Bardhit nuk ka asnjë arsye apo alibi që Peleshi të mos thërrasë Këshillin e Mandateve, për të cilin tha se do të kërkojnë sërish mbledhjen.
