Partia Demokratike ka përmbyllur protestën e radhës duke ndjekur skenarin e saj tradicional, fjalimet e anëtarëve të kryesisë, mesazhi i Sali Berishës dhe hedhja e molotovëve drejt Kryeministrisë. Megjithatë, ajo që e bëri këtë tubim të ndryshëm nga herët e kaluara ishte strategjia e Policisë së Shtetit, e cila reagoi më ashpër se herët e tjera.
Gjatë fjalës së tij, Berisha përsëriti qëndrimin se PD mbetet shpresa e vetme për të shpëtuar Shqipërinë nga ai që e cilësoi si "narkoshteti i Edi Ramës". Ai bëri një krahasim me opozitën hungareze, duke argumentuar se ndryshe nga rasti i Orbanit, në Shqipëri pushteti ka goditur liderët opozitarë dhe ka përdorur grupet kriminale për të deformuar votën.
Një lëvizje e re në strategjinë e tij ishte ftesa e drejtpërdrejtë për kryeministrin, duke e sfiduar atë për një përballje televizive, përtej thirrjeve për qeveri teknike.
Sapo përfundoi fjalimi i kreut të PD, situata u tensionua me hedhjen e lëndëve piroteknike dhe molotovëve. Policia u përgjigj menjëherë duke përdorur ujë, gazin lotsjellës dhe sprajin irritues, ndërsa ndërhyri për të arrestuar të rinjtë. Efektivët nuk kursyen as deputet e PD, duke u hedhur sprraj në fytyrë.
Pas përplasjeve, nga radhët e opozitës mbetën të lënduar deputetët Flamur Noka, Luçiano Boçi, Klevis Balliu dhe aktivisti Aulon Kalaja të cilët morën ndihmë mjekësore në spital. Ndërsa nga ana tjetër një efektiv mbeti i lënduar me djegie dhe lëndime në kokë.
Ndërhyrja e policisë ishte e njëjtë edhe tek Parlamenti e cila shfryu protestën më shpejt se herët e tjera, duke mos i lënë as të mblidhen para godinës.
Në mbyllje të tubimit, Berisha akuzoi drejtorin e ri të Policisë së Shtetit, Skënder Hitaj, për "ndërhyrje brutale". Ai e cilësoi protestën si të suksesshme dhe paralajmëroi se mosbindja civile do të vijojë, duke njoftuar se data e radhës do të bëhet publike së shpejti.
