Policia e Shtetit po kalon një nga momentet më të errëta të saj. Ndërsa mbi drejtuesin e saj, Ilir Proda, rëndojnë akuza të rënda për lidhje me krimin dhe ende nuk ka asnjë sqarim publik për fatin e celularit të tij, institucioni që ai drejton zgjedh të shfaqet në foto ceremoniale dhe të shpërndajë dekorata.
Në një kontrast të fortë me realitetin e hetimeve të munguara, Proda ka dalë sot publikisht për të dekoruar një inspektor policie, Marsel Bizja, i cili gjatë protestës së opozitës ndërhyri për të shpëtuar një qytetar nga djegia me molotov. Një akt individual që meriton respekt, por që përdoret si simbol pozitiv në një moment kur vetë kupola e Policisë e Shtetit është vënë në hije nga skandale të rënda.
Gjatë kontrolleve të fundit në biznese dhe ndaj zyrtarëve të përfshirë në dosjen “Balluku”, Byroja Kombëtare e Hetimit dhe SPAK e përjashtuan plotësisht Policinë e Shtetit nga procesi hetimor, duke sinjalizuar mungesë besimi ndaj strukturës që teorikisht duhet të jetë shtylla e rendit dhe ligjit.
Megjithatë, kreu i Policisë gjeti kohë për ceremoni dhe fjalime solemne, duke dorëzuar certifikata me motivacione për humanizëm dhe profesionalizëm gjatë festës së fundvitit të Drejtorisë Vendore të Policisë Tiranë. Fjalë të mëdha për misionin e policisë, në një realitet ku krimi i organizuar vijon të mbetet i paprekur dhe institucionet e specializuara e anashkalojnë Policinë e Shtetit.
Sikur energjia e shfaqur për dekorata dhe ceremoni të shoqërohej me transparencë, përgjegjësi dhe veprim real ndaj krimit, situata do të ishte ndryshe. Por sot, mes heshtjes për akuzat dhe shfaqjeve publike, mbetet përshtypja se dekoratat po përdoren për të mbuluar dështimet, jo për t’i përballur ato.
