Përmes një videoje të publikuar në rrjetet sociale, Kryetari i Partisë Mundësia, Agron Shehaj, ka bërë thirrje për mbajtjen e një proteste në datën 5 Mars, në orën 18:00, përpara Kuvendi i Shqipërisë. Shehaj ka shpërndarë pamje që sipas tij vijnë nga Rrjolli, ku protestuesit janë përplasur sërish me Policinë e Shtetit. Në video shfaqen momente tensioni, ku qytetarë pretendohet se janë dhunuar dhe shoqëruar me forcë drejt komisariatit.
“Po i rrahin me grushte, me të fortë. Po rrahin gra, pleq, fëmijë. Pse? Sepse nuk pranojnë që një oligark t'u vjedhë pronën, nuk dorëzohen”, shprehet Shehaj në reagimin e tij.
Kreu i Partisë Mundësia fton qytetarët që, sipas tij, po përballen me abuzime të pushtetit mbi pronat e tyre, t’i bashkohen protestës. Ai përmend banorët e Rrjollit, familjet në Durrës që prej javësh protestojnë për çështje pronësie, si edhe qytetarë nga zona të tjera të vendit, përfshirë Thethin dhe jugun.
Në statusin e tij, Shehaj shkruan:
“Prona është padrejtësia më e madhe që i është bërë shqiptarëve.
Të enjten, 5 Mars, ora 18:00, protestë para Parlamentit.
Për banorët e Rrjollit. Për familjet e Durrësit. Për Thethin. Për jugun, për ‘pikat e vogla’ kudo në Shqipëri. Për çdo shqiptar që i është grabitur prona.
Nuk mund të rrimë spektatorë kur dhunohen gra, fëmijë dhe të moshuar nga të fortët, vetëm sepse mbrojnë tokën e tyre nga grabitja.
Eja edhe ti!
Bashkë mund t’ia dalim. Prona duhet të shkojë te i zoti!”
Shehaj thekson se protesta synon të sensibilizojë opinionin publik mbi çështjen e pronave dhe, sipas tij, të kundërshtojë dhunën dhe abuzimet ndaj qytetarëve.
