Kreu i Grupit Parlamentar të Partisë Demokratike, Gazment Bardhi, ka reaguar pas deklaratës së Presidencës lidhur me kërkesën e opozitës për shkarkimin e Presidentit Bajram Begaj.
Ai publikoi dokumente që, sipas tij, tregojnë se djali i Presidentit, Klajdi Begaj, paguhet me 30 mijë euro në vit nga kompania e sigurimeve ANSIG, e cila ka kontrata prokurimi me Presidencën.
Bardhi e akuzoi kreun e shtetit për “korrupsion dhe përfitim të paligjshëm”, duke theksuar se i biri i Begajt jeton dhe punon në Gjermani, ndërkohë që përfiton pagesë nga Shqipëria. “Kuvendi nuk mund të mbyllë sytë përpara korrupsionit që nis nga maja e shtetit,” deklaroi Bardhi.
Reagimi i plotë:
Si gjithmonë, Bajram Begaj foli, por nuk tha asgjë!
Çfarë e pengoi “Doktorin e Mrekullive”, njëherazi Presidenti, të pohojë se djali i tij paguhet pa qenë fare në Shqipëri nga kompania me të cilën Presidenca ka kontratë për të gjitha prokurimet e institucionit? Sado që të shmanget e të përdridhet Presidenti i çnderuar, përgjigja është vetëm një: Korrupsioni dhe përfitimi i paligjshëm i Presidentit!
Fotot më poshtë janë marrë nga dokumente zyrtare të deklarimit të pasurive dhe nga Thesari i Shtetit. Një shpjegim i shkurtër i tyre: I biri i Presidentit jeton në Gjermani, ku paguhet nga një spital si mjek. Por, 6 muaj pas emërimit të babait president, paguhet edhe në Shqipëri nga kompania e sigurimeve, me të cilën ka kontratë prokurimi presidenca. Pagesa është 30 mijë euro në vit.
Ky është vetëm një nga rastet skandaloze për të cilat kemi kërkuar shkarkimin e Presidentit të çnderuar Bajram Begaj. Ka edhe të tjera. Prandaj, Kuvendi nuk mund të mbyllë sytë përpara korrupsionit, që nis nga maja e shtetit.
