Presidenti i Republikës, Bajram Begaj dhe ministri i Mbrojtjes, Pirro Vengu, kanë zhvilluar një ceremoni në Portin e Durrësit për 100-vjetorin e krijimit të Forcave Detare Shqiptare, ndonëse data zyrtare që shënon themelimin e tyre është 25 dhjetori.
Megjithëse festën e kanë nisur 8 ditë përpara, presidenti dhe ministri kanë publikuar foto nga ceremonia e sotme ku nuk mungojnë urimet.
Ministri ka qenë i pari që ka shprehur urimet që në mëngjes duke nderuar të gjithë ata që kanë shërbyer ndër vite në mbrojtjen e kufijve detarë të vendit.
“Mirëmëngjes dhe gëzuar 100 vite Forca Detare Shqiptare. Nderim për një shekull shërbim dhe përkushtim në mbrojtje të kufijve blu të Atdheut, të jetës njerëzore dhe duke valëvitur flamurin shqiptar krenar në ujërat ndërkombëtare!”, shkruan Vengu në mesazhin e tij.
Nuk dihet nëse ky urim i parakohshëm është një gafë e Begajt dhe Vengut, apo thjesht një entuziazëm i nxituar, por për korrektesë po sjellim edhe datat zyrtare, ashtu siç janë të afishuara në faqen online të Forcave të Armatosura, ku 25 dhjetori është përcaktuar si dita zyrtare e krijimit të Forcave Detare.
