Adriatik Lapaj dhe mbështetësit e tij janë përplasur sërish gjatë natës me efektivët e Policisë së Shtetit. Shkak i ndërhyrjes, ashtu si edhe herët e mëparshme, është bërë çadra e improvizuar e mbuluar me plasmas, e ngritur nga protestuesit për t’u mbrojtur nga i ftohti gjatë natës.
Sipas Lapajt efektivët e policisë kanë ndërhyrë duke tërhequr plasmasin e tendës dhe duke rrëzuar në tokë karrige dhe sende të tjera të protestuesve.
Përmes një statusi në rrjetet sociale, Lapaj e cilëson ndërhyrjen policore si pjesë të operacionit që ai e ironizon me emrin “Plastmasi”.
“Mbrëmë në orën 00:57, plot 35 punonjës policie u paraqitën të vendosur dhe sekuestruan plastmasin e tendës së improvizuar për t’u ruajtur nga i ftohti i natës, pasi kishin marrë informacion se po këndonim,” shkruan Lapaj.
Ai ironizon arsyen e ndërhyrjes, duke shtuar se protesta ka hyrë në ditën e 37-të pa ndërprerje. “Si mund të këndonim ne në ditën e 37 të protestës pa ndalim? Duhet të kishim ikur tashmë… Edi Rama ka halle të tjera!” – shprehet ai.
Në fund të reagimit, Lapaj bën thirrje për një protestë masive ditën e shtunë, më 17 janar, në orën 18:00, në shesh, “kundër Edi Ramës dhe bandës që drejton”.
