Mazhoranca dhe opozita zhvilluan të hënën një mbledhje konsultative për ndarjen e re të komisioneve parlamentare, pas propozimit të kryeministrit Edi Rama për të rritur numrin e tyre nga 8 në 11 dhe për të bashkuar Komisionin për Çështjet Europiane me atë për Punët e Jashtme. Ky ndryshim i kalon shumicës drejtimin e komisionit që më parë drejtohej nga opozita.
Kreu i grupit parlamentar të PD-së, Gazment Bardhi, e cilësoi këtë një veprim autoritar dhe të njëanshëm.
“Është e papranueshme që ndryshime të tilla të lajmërohen në Asamblenë e PS-së dhe jo përmes një procesi të përbashkët me opozitën. Me shkrirjen e Komisionit të Integrimit, opozita humbet rolin e saj konstruktiv në procesin e integrimit europian, një përgjegjësi që ka pasur për 21 vite me radhë”, u shpreh Bardhi.
Ai kundërshtoi edhe justifikimin e mazhorancës se po ndiqet modeli i Bundestagut gjerman, pasi sipas tij “në Bundestag ekziston si Komisioni i Jashtëm, ashtu edhe ai për Çështjet Europiane, nuk janë të bashkuar”.
Nga ana tjetër, kreu i grupit parlamentar të PS-së, Taulant Balla, argumentoi se ndryshimi është i justifikuar nga faza aktuale e integrimit të Shqipërisë. Balla kërkoi bashkëpunim nga opozita për ndryshimet në Rregulloren e Kuvendit dhe për të çuar përpara proceset e tjera institucionale.
“Në këtë moment të rëndësishëm për aderimin në BE, është e natyrshme që mazhoranca të udhëheqë procesin përmes një komisioni më të fuqizuar dhe gjithëpërfshirës. Është domosdoshmëri që të përmbyllim këtë etapë sa më shpejt, për të kaluar te votëbesimi i qeverisë dhe programit të saj”, tha Balla.
Aktualisht, opozita ende nuk ka dërguar emrat për katër kryesitë e komisioneve që i takojnë sipas ndarjes së re, ndërsa PS raportohet se ka përzgjedhur shtatë përfaqësuesit e saj.
