Partia Demokratike, dega Pukë, ka vendosur të ngrejë flamurin e luftës kundër nepotizmit. Jo në ndonjë bashki të madhe, jo në ndonjë institucion me buxhete miliona euro, por në Bashkinë e Pukës – aty ku lidhjet familjare duken më të forta se çdo nen ligjor.
Në një kërkesë drejtuar Komisionit Qendror të Zgjedhjeve, PD Pukë kërkon interpretim ligjor për disa këshilltarë bashkiakë, duke pyetur nëse janë në konflikt interesi për shkak të pozicioneve që mbajnë familjarët e tyre në administratën vendore. Me pak fjalë: a është rastësi apo model organizimi që pushteti vendor funksionon si një biznes familjar?
Rastet e paraqitura janë domethënëse:
• Gjon Gjoka, Kryetar i Këshillit të Bashkisë – ndërkohë bashkëshortja e tij është Specialiste në Drejtorinë e Menaxhimit të Financave. Pra, njëri kontrollon, tjetra menaxhon. Familje me ndarje të qartë rolesh.
• Enver Sulejmani, nënkryetar i Këshillit – bashkëshortja e tij mban postin e këshilltares së Kryetarit të Bashkisë. Këshillat qarkullojnë brenda familjes, përpara se të dalin në zyrë.
• Ndue Lala, këshilltar – djali i tij është Administrator i një Njësie Administrative. Brezi i ri nuk pret radhën; hyn direkt në administrim.
Sipas PD-së, këto punësime janë bërë pasi këta persona kanë marrë mandatin si këshilltarë bashkiakë. Pyetja që i drejtohet KQZ-së është e thjeshtë: a kemi papajtueshmëri ligjore apo thjesht përputhje familjare?
Në thelb, kërkesa është për një “arsyetim ligjor”. Por mes rreshtave lexohet një tjetër debat: a është pushteti vendor në Pukë një institucion publik apo një strukturë ku mbiemri peshon më shumë se meritokracia?
PD Pukë thotë se pret përgjigjen e KQZ-së. Deri atëherë, mbetet për t’u parë nëse do të kemi një sqarim ligjor… apo një tjetër konfirmim se në politikën vendore, konflikti i interesit shpesh ngatërrohet me “interesin e familjes”.
