Grupi Parlamentar i Partisë Demokratike ka reaguar me ashpërsi ndaj vendimit të Këshillit të Lartë Gjyqësor për të dërguar çështjen e gjyqtares së Posaçme, Irena Gjoka, pranë Inspektorit të Lartë të Drejtësisë, pavarësisht se ajo rezulton e dënuar në Greqi për përdorim të një vize të falsifikuar.
Në reagimin e saj, PD e cilëson vendimin e KLGJ-së si “të papërgjegjshëm dhe të paprecedent”, duke ngritur dyshime mbi pavarësinë dhe paanshmërinë e këtij institucioni.
“Dërgimi për kompetencë te ILD është një përpjekje e qartë për ta zvarritur çështjen, me pasoja të rënda për pushtetin gjyqësor, të drejtat e qytetarëve dhe besimin e publikut te sistemi i drejtësisë,” thuhet në deklaratë.
PD i bën thirrje ILD-së të zbatojë ligjin dhe të kërkojë menjëherë nga KLGJ-ja deklarimin e mbarimit të mandatit për gjyqtaren e dënuar.
Vendimi i KLGJ-së u mor në mbledhjen e së premtes, ku u rrëzua një kërkesë për verifikimin e statusit të gjyqtares Gjoka lidhur me mosdeklarimin e një dënimi penal të dhënë nga drejtësia greke në vitin 2005. Çështja, sipas propozimit të një prej anëtarëve, pritet të kalojë për shqyrtim te ILD.
