Partisë Demokratike nuk i del inati me deklaratën e komisioneres Marta Kos. Pas akuzave të Berishës dhe përqeshjeve banale nga përfaqësues të kësaj force politike, grupi parlamentar i PD i ka paraqitur zyrtarisht një notë verbale delegacionit të BE-së, lidhur me deklaratat e komisioneres për zgjedhjet e 11 majit në Shqipëri.
Sipas Partisë Demokratike, deklarata të tilla minojnë besimin e qytetarëve shqiptarë tek vlerat europiane të institucioneve të BE-së.
“Ne shprehim me respekt shqetësimin tonë se ky vlerësim nuk pasqyron realitetin e vërejtur gjatë procesit zgjedhor. Një deklaratë e tillë duket e papërputhshme me gjetjet e OSBE-ODIHR, nuk merr parasysh qëndrimet e shprehura nga Anëtarët e Parlamentit Evropian që shërbyen si vëzhgues të zgjedhjeve në Shqipëri dhe rrezikon të ndikojë besimin e qytetarëve shqiptarë tek institucionet e Bashkimit Evropian”, shkruan Bardhi.
Grupi Parlamentar i PD e mbyll Notën Verbale duke i kërkuar Komisioneres që deklaratat e saj të jenë në përputhje me vlerësimet e institucioneve zyrtare që monitorojnë zgjedhjet.
“Opozita në Shqipëri dëshiron të shprehë rezervat e saj lidhur me komentet e Komisioneres dhe kërkon me respekt që deklaratat e ardhshme të jenë në përputhje me vlerësimet e institucioneve kompetente përgjegjëse për vëzhgimin e zgjedhjeve. Përndryshe, interpretimet personale që nuk bazohen në gjetjet faktike të këtyre institucioneve mund të kontribuojnë pa qëllim në uljen e besimit publik tek vlerat e vërteta evropiane që institucionet e Bashkimit Evropian synojnë të mbrojnë” – shkruan Bardhi.
Nota Verbale iu paraqit Delegacionit të Bashkimit Europian në Tiranë nga kreu i Grupit Parlamentar të Partisë Demokratike, Gazment Bardhi në emër të opozitës.
