Mbledhja e Këshillit Kombëtar të Partisë Demokratike ka përfunduar pas rreth dy orësh, me fokus organizimin e protestës kombëtare të thirrur për të hënën në bulevardin “Dëshmorët e Kombit” në Tiranë.
Kryetari i PD, Sali Berisha, mbajti fjalën e tij në hapje, ndërsa diskutimet u zhvilluan me dyer të mbyllura dhe pa praninë e medias. Sipas burimeve mediatike, në mbledhje është propozuar radikalizimi i aksionit opozitar, me organizimin e demonstratave dhe protestave si brenda ashtu edhe jashtë vendit.
Gjatë mbledhjes, Lisandër Hoxha ka propozuar një ndryshim në statutin e PD-së për largimin nga strukturat e partisë të eksponentëve të lidhur me fondacionin Soros. Ndërsa Aulon Kalaja ka kërkuar ngritjen e një Komisioni Hetimor për mënyrën se si janë dhënë firmat e deputetëve të PD-së për zgjedhjen e Avokatit të Popullit, Endri Shabani.
Nga ana tjetër, anëtari i Kryesisë së PD, Dritan Burgija, është larguar nga mbledhja e Këshillit Kombëtar, pasi mësohet se nuk është lejuar të marrë fjalën.
“Ne vijmë të flasim në forume, ju thoni nuk lejohet të flasim për asgjë veç protestës”, është shprehur Burgija, sipas burimeve mediatike.
Mbledhja e Këshillit Kombëtar ka përfunduar, teksa aktualisht në selinë e PD po mbahet një mbledhje me kryetarët e degëve.
