Grupi Parlamentar i PD ka reaguar pas njoftimit të Kryetarit të Kuvendit për mbledhjen e Këshillit për Rregulloren, Mandatet dhe Imunitetin, e planifikuar për më 15 prill 2026, ku pritet të miratohet Rregullorja e re e Kuvendit.
Sipas PD, shqyrtimi i kësaj çështjeje përpara zbardhjes së vendimit të Gjykatës Kushtetuese përbën një “akt të paprecedent” dhe bie ndesh me parimet e shtetit ligjor.
Në reagimin e saj, opozita e cilëson këtë veprim si injorim të autoritetit të Gjykatës Kushtetuese dhe si cenim të besimit publik ndaj vendimeve të saj, duke e konsideruar njoftimin e Kryetarit të Kuvendit si antikushtetues.
Në deklaratën zyrtare, Grupi Parlamentar i PD thekson se Kryetari i Kuvendit, Niko Peleshi, ka njoftuar thirrjen e mbledhjes së Këshillit për Rregulloren, Mandatet dhe Imunitetin për datën 15.04.2026, me rend dite shqyrtimin e projektvendimit për ndryshime në Rregulloren e Kuvendit.
Sipas opozitës, ky projektvendim përfshin dispozita që janë shfuqizuar nga Gjykata Kushtetuese, duke anashkaluar vendimmarrjen e saj dhe duke shkelur parimet e shtetit të së drejtës.
PD kujton gjithashtu se për tre muaj me radhë, Kryetari i Kuvendit ka refuzuar të thërrasë mbledhjen për shqyrtimin e kërkesës së SPAK për autorizimin e arrestimit të ish-zëvendëskryeministres Balluku, me arsyetimin se pritej zbardhja e një vendimi të Gjykatës Kushtetuese lidhur me një çështje tjetër.
Ndërkohë, sipas opozitës, në rastin aktual, edhe pse çështja lidhet drejtpërdrejt me vendimin e Gjykatës Kushtetuese të datës 23 shkurt 2026, Kuvendi ka vendosur të vijojë procedurën pa pritur zbardhjen e tij.
Në përfundim, Grupi Parlamentar i Partisë Demokratike e konsideron këtë veprim si antikushtetues, duke theksuar se cenon parimet bazë të shtetit ligjor dhe besimin e publikut te vendimet e Gjykatës Kushtetuese.
