Pas vendimit të Gjykata Kushtetuese e Shqipërisë për rrëzimin e ndryshimeve në rregulloren e Kuvendit, Partia Demokratike e Shqipërisë dhe Partia Socialiste e Shqipërisë kanë nisur punën për hartimin e një rregulloreje të re parlamentare.
Grupi parlamentar i PD-së ka depozituar në Kuvend disa propozime dhe kërkesa që synojnë gjetjen e një gjuhe të përbashkët me mazhorancën, por fokusi i tyre duket se nuk është përqendruar te respektimi i rregullores së Kuvendit, për të cilën opozita ka debatuar shpesh me shumicën, por më shumë te privilegjet dhe përfitimet e deputetëve.
Në krye të listës së propozimeve është përcaktimi i kryetarëve dhe përbërjes së grupeve të miqësisë, të cilat shpesh konsiderohen si struktura që shërbejnë më shumë për udhëtime jashtë vendit nga deputetët.
Gjithashtu, PD kërkon përbërje të barabartë në Sekretariatin e Etikës, organi ku merren masat disiplinore ndaj deputetëve.
Një tjetër kërkesë interesante lidhet me stafin ndihmës. Në propozim thuhet se stafi ndihmës duhet të jetë i barabartë me numrin e komisioneve parlamentare. Ky privilegj do t’u takonte vetëm PD-së dhe PS-së, ndërsa partitë e tjera parlamentare do ta përfitonin sipas numrit të anëtarëve të grupit parlamentar.
Opozita ka menduar edhe për lodhjen fizike dhe rendimentin e deputetëve, pasi në propozim parashikohet që nëse seanca plenare vijon pas orës 22:00, ajo të ndërpritet dhe të vazhdojë të nesërmen në orën 10:00.
