Kryetari i Partisë Demokratike, Sali Berisha, ka kujtuar 8 Dhjetorin e vitit 1990, një datë që në 35-vjetorin e saj e gjen sërish atë në krye të partisë që, teorikisht, ka dështuar të çrrënjos ‘mbetjet’ e regjimit komunist.
Si në çdo përvjetor të Ditës së Rinisë, edhe këtë herë vendin kryesor në fjalimin e Berishës e zë Azem Hajdari, me të cilin ai pati jo pak përplasje në fillimet e pluralizmit. Berisha theksoi se protestat dhe “revolucioni demokratik” ndanë epokat dhe vendosën pluralizmin politik.
Ai u shpreh se studentët e dhjetorit 1990 “ishin misionarë të paepur, të cilët që në protestën e parë shpallën si moton e revolucionit të tyre, liri, demokraci, Shqipëria si Evropa”.
“Si sot 35 vite më parë, më 8 dhjetor 1990, studentët e UT dhe shkollave të tjera të larta, të udhëhequr nga Azem Hajdari, nisën protestat, revolucionin demokratik që si një uragan vërtet ndau epokat dhe vendosi pluralizmin politik. Sot mbarë kombi shqiptar nderon 8 dhjetorin si datën më të rëndësishme në historinë e lirisë së tij pas shpalljes së pavarësisë. 8 dhjetori 1990 është ditëlindja e lirive. Në këtë datë, engjëjt e demokracisë, të udhëhequr nga prijësi i tyre legjendar Azem Hajdari, u ngritën në Tiranë në lëvizjen studentore për të përmbysur diktaturën komuniste. Studentët ishin misionarë të paepur, të cilët që në protestën e parë shpallën si moton e revolucionit të tyre, liri, demokraci, Shqipëria si Evropa”, tha Berisha.
Fatkeqësisht, edhe pas 35 viteve, Shqipëria vazhdon të mos ketë një demokraci të konsoliduar dhe politika mbetet ende në duart e figurave të vjetra të tranzicionit të pafund. Edhe më ironikja, partia që u themelua për të sjellë pluralizmin dhe demokracinë, sot nuk është demokratike as në formë dhe as në frymë. Madje, drejtohet ende nga i njëjti person, duke u shndërruar nga një forcë politike e idealeve, në një parti që mbron interesat e një familjeje dhe jo vlerat demokratike që dikur pretendonte të përfaqësonte.
