Grupi parlamentar i Partisë Demokratike ka kërkuar zhvillimin e një debati të posaçëm në Kuvend për shkak të situatës së rënduar të kriminalitetit në vend.
Në kërkesën zyrtare, demokratët i referohen raporteve ndërkombëtare, përfshirë atë të Departamentit Amerikan të Shtetit, ku theksohet se paratë e krimit të organizuar po pastrohen përmes sektorit të ndërtimit dhe projekteve publike.
Sipas PD-së, këto gjetje përbëjnë një alarm serioz për sigurinë dhe sundimin e ligjit në vend, ndaj kërkohet që qeveria të japë llogari për masat e marra dhe përgjegjësitë institucionale.
