Partia Demokratike e drejtuar nga Sali Berisha ka njoftuar ri-aktivizimin e faqes së saj origjinale në Facebook, duke e cilësuar zhvillimin si një tjetër fitore në betejën për simbolet dhe emrin e partisë.
Në njoftimin zyrtar thuhet se, në vijim të vendimit të formës së prerë të Gjykatës së Apelit të Juridiksionit të Përgjithshëm Tiranë (Vendimi Nr. 723, datë 11 Qershor 2024), i cili konfirmoi të drejtat ligjore mbi emrin, vulën dhe simbolet e Partisë Demokratike të Shqipërisë, faqja në Facebook do të rikthehet nga emërtimi i përkohshëm “Demokratët Euroatlantikë” në “Partia Demokratike e Shqipërisë”.
Kështu, pas betejës për vulën dhe selinë, demokratët festojnë edhe rikthimin e një aseti të rëndësishëm politik: faqen në rrjetin social.
Ironia është se faqja në fjalë prej muajsh kishte humbur jo vetëm emrin, por edhe “vulën” politike, ndërsa Lulzim Basha – që e mbante – është zhdukur nga skena publike thuajse prej një viti, duke lënë pas një profil që më shumë ngjante me arkiv sesa me tribunë opozitare.
Por në politikë, çdo rikthim simbolesh quhet fitore. Edhe kur beteja është për një password.
