Debatet në mbledhjen me dyer të mbyllura të Kryesisë së Partisë Demokratike kanë vijuar me tone të forta, ku Ervin Salianji i është drejtuar drejtpërdrejt kreut të PD-së, Sali Berisha, me një pyetje të drejtpërdrejtë mbi funksionimin e partisë dhe statutin e saj.
Sipas burimeve nga mbledhja, Salianji ka ngritur shqetësimin se drejtues të PD-së po pengohen të zhvillojnë takime me strukturat dhe anëtarësinë demokrate në bazë, duke e konsideruar këtë një devijim nga parimet e funksionimit të partisë.
“Cili nen i statutit na ndalon të takojmë demokratët?”, mësohet të ketë pyetur Salianji Berishën gjatë diskutimeve në Kryesi, duke vënë në pikëpyetje kufizimet e vendosura ndaj aktiviteteve politike në terren.
Burimet bëjnë me dije se kjo ndërhyrje ka shtuar më tej tensionet në mbledhje, e cila është shoqëruar me debate të ashpra dhe përplasje verbale mes drejtuesve. Pyetja e Salianjit është interpretuar si kritikë e drejtpërdrejtë ndaj mënyrës së drejtimit dhe vendimmarrjes brenda Partisë Demokratike.
Mbledhja e Kryesisë vijon ende, ndërsa deri në këto momente nuk ka një reagim apo qëndrim zyrtar nga Sali Berisha apo strukturat drejtuese të PD-së lidhur me debatin e zhvilluar./News 24
