Në përfundim të mbledhjes me dyer të mbyllura të kryesisë së Partisë Demokratike, Ervin Salianji i është përgjigjur akuzave se ka lobuar në grupin parlamentar të demokratëve për kandidaturën e Endrit Shabanit.
Gjatë mbledhjes së kryesisë, Elda Hoti dhe Blendi Himçi janë shprehur se u është kërkuar nga ish-deputeti që të firmosnin për Shabanin. Në reagimin e tij për mediat, Salianji i ka ironizuar këto pretendime, duke deklaruar: “Edhe firmat i paskam firmosur unë që s’jam deputet”.
Salianji u ndal edhe te organizimi i protestave dhe revolta ndaj qeverisë, në lidhje me skandalin Rama–Balluku. Ai tha se është i kënaqur që vendimmarrja për protestën e datës 22 dhjetor ka shkuar në drejtimin që ai e kishte kërkuar prej kohësh.
“Organizimi i protestave dhe revoltës ndaj qeverisë për shkak të skandalit Rama–Balluku, isha i gëzuar që vendimmarrja për protestën e datës 22 shkoi aty ku e kam kërkuar prej kohësh, për të pasur protesta dhe revoltë. Më vjen mirë që në katër orë pati protestë ndaj demokratëve të pakënaqur dhe gjysmë ore ndaj Ballukut”, u shpreh Salianji.
I pyetur nga gazetarët nëse mbledhja e kryesisë ishte e drejtuar kundër tij, Salianji mohoi këtë interpretim, duke theksuar se në mbledhje ka pasur mendime të ndryshme.
“Jo, kishte mendime të ndryshme. Do të ecim përpara. Çdo ndryshim nuk vjen pa sakrificë dhe përplasje. Çdo akuzë dhe çdo idiotësi do t’i përgjigjemi me fakte konkrete”, përfundoi ai.
