Parlamenti miratoi në parim buxhetin e vitit 2026 dhe paketën fiskale, pas një seance maratonë që zgjati rreth 16 orë. Projektligjet u kaluan vetëm me votat e mazhorancës, ndërsa opozita votoi kundër gjatë seancës që nisi në orën 10:00 të ditës së djeshme dhe përfundoi në 03:00 të mëngjesit të sotëm.
Nga radhët e socialistëve pati dy qëndrime të veçuara. Erion Braçe nuk votoi projektligjin “Për sistemin e taksave vendore”, një nismë që ai e ka kritikuar më herët edhe në komisionet parlamentare.
Ndërsa deputeti Vullnet Sinaj nuk mori pjesë në votimin e dy projektligjeve: atij “Për marrëveshjen e paqes fiskale” dhe atij “Për fshirjen, shuarjen dhe pagesën e detyrimeve tatimore ndaj administratës tatimore qendrore dhe detyrimeve të pagueshme në doganë”. Sinaj, me këtë veprim, duket se ka kërkuar të shmangë konfliktin e interesit, pasi nga miratimi i këtyre dy nismave përfiton drejtpërdrejt biznesi i tij, i shtrirë në rrjetin e supermarketeve.
Projektbuxheti i vitit 2026, me një vlerë totale prej 8.8 miliardë euro (886 miliardë lekë), u miratua me 83 vota pro të shumicës, ndërsa 32 deputetë të opozitës votuan kundër. Brenda të njëjtës seancë u miratuan në parim edhe 8 projektligjet që përbëjnë paketën fiskale për vitin e ardhshëm.
Votimi dhe projektligjet e miratura në parim:
Projektligji “Për disa ndryshime dhe shtesa në ligjin nr. 9920, datë 19.5.2008, “Për procedurat tatimore në Republikën e Shqipërisë”, të ndryshuar.
Votimi: 83 vota pro, 0 abstenim, 31 kundër
Projektligji “Për disa ndryshime në ligjin nr. 92/2014, “Për tatimin mbi vlerën e shtuar në Republikën e Shqipërisë”
Votimi: 83 pro, 0 abstenim, 32 kundër
Projektligji “Për disa ndryshime dhe shtesa në ligjin nr. 29, datë 30.3.2023, “Për tatimin mbi të ardhurat”
Votimi: 83 pro, 0 absentim, 32 kundër
Projektligji “Për disa shtesa në ligjin nr. 9632, datë 30.10.2006, “Për sistemin e taksave vendore”, të ndryshuar
Votimi: 82 pro, 0 abstenim, 32 kundër (Erion Braçe nuk voton)
Projektligji “Për faturën dhe sistemin e monitorimit të qarkullimit”, të ndryshuar
Votimi: 82 pro, 0 abstenim, 32 kundër ( Vullnet Sinaj nuk voton)
Projektligji “Për marrëveshjen e paqes fiskale”
Votimi: 83 pro, 0 abstenim, 31 kundër
Projektligji “Për rivlerësimin e pasurisë së paluajtshme”
Votimi: 83 vota pro, 0 abstenim, 31 kundër
Projektligji “Për fshirjen, shuarjen dhe pagesën e detyrimeve tatimore ndaj administratës tatimore qendrore e të detyrimeve të pagueshme në doganë”
Votimi: 82 vota pro, 0 absentim, 30 kundër (Vullnet Sinaj nuk voton)
Projektligji “Për buxhetin e vitit 2026”
Votimi: 83 pro, 0 abstenim, 32 kundër
