Partia në pushtet nuk harron të kthejë nderet e atyre që i kanë shërbyer ndër vite, aq më shumë nëse këto ndere kanë ardhur nga sistemi i “pavarur” i drejtësisë apo i vettingut.
Pasi bëri deputet Olsi Komicin, anëtar të Komisionit të Vettingut që shkarkoi prokurorë e gjyqëtarë, tashmë dy anëtarë të tjerë të kësaj trupe, propozohen për poste publike nga mazhoranca socialiste.
VNA ka mësuar se kryetarja e KPK-së, Genta Bungo ka marrë firmat e Partisë Socialiste për tu bërë Komisionere Kundër Diskriminimit (mandat 5 vjeçar), ndërsa anëtarja tjetër e Komisionit të Vettingut, Alma Faskaj, është përcjellë sot nga Komisioni i Ligjeve tek seanca plenare për tu bërë Komisionere për të Drejtat e Fëmijëve pranë Avokatit të Popullit.
Kuptohet që kjo përkujdesje nuk është e rastësishme dhe hedh hije dyshimi për pavarësinë e procesit të vettingut, i cili gjithashtu kishte anëtare edhe motrën e Belinda Ballukut.
Ndërkohë që gjyqtarë të tjerë, përfshi edhe vetë kryetaren e Gjykatës Kushtetuese, Holta Zaçaj, janë përfshirë në tortën e shpërblimit. Ajo, tashmë është zëvendësguvernatore e parë e Bankës së Shqipërisë.
