Në Tiranë mund të duken sikur janë në luftë. Në sallën e parlamentit përplasen, akuzojnë njëri-tjetrin dhe flasin për krizë politike. Por mjafton një udhëtim jashtë vendit dhe atmosfera ndryshon menjëherë.
Kështu ka ndodhur edhe këtë herë në Romë.
Deputetja e Partisë Demokratike, Jorida Tabaku, është ulur në të njëjtën tryezë me përfaqësues të qeverisë dhe mazhorancës: Arbër Maznikun, Iris Luarasin dhe Ardit Bidon. Një foto e publikuar nga vetë Tabaku në rrjetet sociale tregon momentin e takimit miqësor gjatë vizitës në Itali.
Në Facebook ajo shkruan:
“Me kënaqësi takimi me senatorin Raffaele De Rosa në ditën e parë të takimeve në Itali.
Shkëmbyem mendime për miqësinë mes vendeve tona dhe rrugëtimin e Shqipërisë drejt BE-së, si edhe për rëndësinë e rritjes së investimeve italiane dhe projekteve strategjike në vend.”
Pra, ndërsa në Tiranë përplasja mes PS dhe PD paraqitet si një konflikt i përhershëm politik, në Romë duket se palët gjejnë shumë më lehtë gjuhën e përbashkët.
Sepse në politikën shqiptare ka dy skena:
njëra për publikun dhe tjetra për udhëtimet zyrtare. Në të parën bëhen kundërshtarë të betuar, ndërsa në të dytën kthehen në delegacion të përbashkët që diskuton për “miqësinë mes vendeve” dhe projektet strategjike.
