Parlamenti sot i është rikthyer normalitetit të punimeve të tij. Raporti i Prokurorit të Përgjithshëm, Olsian Çela, u pasua me diskutime me tone normale nga deputetët e mazhorancës dhe opozitës. Asnjë përplasje verbale apo fizike, asnjë zhurmë, por thjesht debate, edhe pse në thelb banale, për një raport ndaj të cilit secila palë kishte rezervat e veta.
Kësaj paqeje i parapriu votimi, me votat e PD dhe PS, i komisioneve të Reformës Zgjedhore dhe asaj Territoriale. Dy komisione që, në fakt, me gjasë do t’u ofrojnë disa shpërblime financiare deputetëve pjesëmarrës, por vështirë se do të gjejnë një zgjidhje për këto reforma të domosdoshme. Historia ka treguar se PD dhe PS nuk kanë gjetur kurrë dakordësinë, dhe secila palë, pas humbjes në zgjedhje, ia ka vënë fajin reformës së radhës.
Gjithsesi, seanca e sotme duket se e ka futur Parlamentin në hullinë e zakonshme, ku debatet janë pjesë e “punës”, dhe pas tyre shijohet një filxhan kafeje. Belind Këlliçi zëvendësoi Gazment Bardhin në negociatat për kohën dhe mënyrën e pyetjeve ndaj Prokurorit të Përgjithshëm dhe drejtuesit të SPAK, çka ndoshta është një sinjal se zhurmat janë zëvendësuar me qetësinë në sallë, sikundër vështirë të besohet se me dinamikat aktuale të PD-së Gazi do të zëvendësohet nga Belindi.
