Evis Sala duket se ende nuk e ka ndarë qartë rolin e saj, është Ministre e Shëndetësisë apo Ministre e Jashtme. Ndërsa sistemi shëndetësor në Shqipëri lëngon nga problemet, ministrja po shpenzon më shumë kohë në kancelaritë europiane sesa në korridoret e spitaleve ku pacientët presin me orë të tëra.
Së fundmi, Sala njoftoi një takim në Bruksel me Komisionerin Várhelyi për "Kapitullin 28", duke premtuar reforma dhe standarde të BE-së. Por, teksa ajo buzëqesh nëpër zyrat e Brukselit, realiteti në terren është i zymtë. Pacientët vazhdojnë të përballen me mungesë ilaçesh, radhë të pafundme, infrastrukturë spitalore që lë për të dëshiruar, kostot e mjekimit po bëhen të papërballueshme, mjekët dhe infermierët që po largohen masivisht drejt BE për kushte më të mira.
Por Evis Sala nuk ka kohë për t’i parë nga afër këto probleme pasi është e zënë me udhëtimet jashtë vendit. Duket se ministrja ka marrë përsipër edhe detyrat e kolegut të saj, Ferit Hoxha, duke u fokusuar te diplomacia. Megjithatë infrastruktura e dobët spitalore dhe mungesa e pajisjeve nuk zgjidhen me foto në Bruksel, por me punë në terren.
Integrimi europian është një objektiv i rëndësishëm, por ai nuk arrihet me raporte diplomatike ndërsa spitalet tona nuk plotëson as kushtet minimale të shërbimeve. Prandaj është e rëndësishme që ministrja Sala të ulet në tokë dhe të kuptojë se shëndetësia e shqiptarëve po lëngon këtu, jo në Bruksel.
