Pasi shëndetësia shqiptare arriti perfeksionin — me spitale pa mungesa, me lista pritjeje që nuk ekzistojnë dhe me pacientë që nuk ankohen më për ilaçe — Ministrja e Shëndetësisë dhe Mirëqenies Sociale Evis Sala, ka vendosur të kalojë në një tjetër front strategjik: barazinë gjinore.
Gjatë një bashkëbisedimi me studentë dhe pedagogë të Fakultetit të Shkencave Sociale, ministrja prezantoi me entuziazëm risitë e Ligjit të ri “Për Barazinë Gjinore”, duke theksuar se për herë të parë njihet puna e papaguar dhe ekonomia e përkujdesit si kontribut real ekonomik.
“Barazia në letër nuk është barazi në jetë,” – deklaroi ajo, duke e cilësuar ligjin si një zgjedhje të qartë politike për ta vendosur barazinë gjinore në qendër të zhvillimit dhe mirëqenies.
Ndërkohë, në jetën reale, pacientët vazhdojnë të kërkojnë ilaçe që mungojnë, familjarët të mbledhin para për trajtime dhe mjekët të punojnë me ngarkesë të shtuar. Por ndoshta kjo është pikërisht arsyeja pse duhet barazia: që hallet të ndahen në mënyrë të drejtë.
Sepse kur sistemi shëndetësor nuk ka më probleme për të zgjidhur, është koha të merremi me filozofinë e zhvillimit. Dhe në fund të fundit, çfarë është një recetë pa ilaç përballë një ligji me ide?
