Opozita ka hedhur hapat e parë konkretë drejt përzgjedhjes së kandidatit të përbashkët për kryetar të Bashkisë së Tiranës. Në takimin e zhvilluar sot mes përfaqësuesve të Partisë Demokratike, Ilir Alimehmeti dhe Belind Këlliçi, si dhe përfaqësuesve të Partisë Mundësia, Erad Kapri dhe Barbara Doda, janë diskutuar disa emra potencialë.
Burime nga tryeza negociuese bëjnë me dije se deri më tani është arritur dakordësi parimore për tre kandidatë të mundshëm: Edlira Çepani, Ermal Hasimja dhe Florian Hackaj.
Takimet mes forcave opozitare pritet të vijojnë edhe në ditët në vijim, me synimin për të dalë me një emër unik që do të sfidojë kandidatin e mazhorancës në zgjedhjet e parakohshme lokale për Bashkinë e Tiranës.
