Sekretari i Përgjithshëm i Partisë Demokratike, Flamur Noka, deklaroi se PD nuk do të lejojë kurrë që elementë të krimit të organizuar të kenë ndikim brenda saj.
I ftuar në emisionin “Off the Record” në A2 CNN, Noka komentoi edhe situatën e Ervin Salianjit, duke thënë se ai ka kaluar disa vija të kuqe. Sipas Nokës, PD është e vetmja forcë politike që ka sanksionuar funksionimin e fraksioneve brenda partisë. “Kush kërkon të krijojë një fraksion, të vijë. Është model europian, nuk e kemi shpikur ne, por e implementojmë. Nuk duhet të jesh individ që të kesh fraksion, por duhet të kesh një ekip, një grup njerëzish nga qendra në bazë që përfaqësoni interesat e tyre,” tha Noka.
Ai shtoi se problemi lind kur agjenda e individëve drejtohet nga të tjerë dhe nuk përkon me agjendën e partisë, duke e kthyer demokracinë në anarki dhe duke i lejuar kundërshtarët të kontrollojnë aktivitetin politik.
