Rigels Rajku, i njohur për publikun si Noizy, ka befasuar me një deklaratë të bërë këtë të shtunë në emisionin Inside Albania në Euronews Albania, ku foli hapur për mundësinë e hyrjes në politikë. I pyetur nga moderatorja Alice Taylor nëse do të pranonte një ftesë nga kryeministri Edi Rama për të drejtuar Ministrinë e Kulturës, reperi u përgjigj pa mëdyshje: “Unë 100% do ta pranoja.”
Noizy tha se nuk e sheh politikën si një rrugë për të bërë para, pasi – sipas tij – i ka fituar të gjitha të ardhurat nga muzika, pa u përfshirë kurrë në aktivitete ilegale. Ai e konsideron veten një “njeri fjale” që nuk premton shumë, por që, nëse hyn në politikë, do të mbajë çdo premtim të dhënë.
Në intervistë, reperi foli edhe për filozofinë e tij mbi jetën dhe pasurinë, duke u shprehur se paratë nuk sjellin lumturi, ndërsa paqen e gjen shpesh në gjëra të thjeshta, larg luksit. Deklaratat e tij erdhën mes shakasë dhe seriozitetit, por lanë hapur një pyetje për publikun: a është politika shqiptare gati për një Ministër të Kulturës që flet me gjuhën e rrugës dhe të skenës muzikore?
