Lista e “vetëpërjashtimeve” në Partinë Demokratike duket se vazhdon të zgjerohet. Rasti i radhës vjen nga dega e Elbasanit, ku kryesia ka vendosur largimin nga anëtarësia të Doris Madhit.
Vetë Madhi, në një lidhje me emisionin “Terminal” në A2CNN, tha se nuk është njoftuar për mbledhjen ku u mor vendimi dhe se propozimi për përjashtimin e saj është bërë nga deputetja e listës së mbyllur në Elbasan, Klodiana Çapja.
Ajo pretendon se përplasja lidhet me denoncimet që ka bërë për atë që i quan pazare dhe bashkim votash me anëtarë të PS-së në Këshillin Bashkiak, për të realizuar afera nga të cilat, sipas saj, kanë përfituar disa anëtarë të PD-së.
Nga ana tjetër, dega e PD-së në Elbasan sqaroi se vendimi është marrë unanimisht, pasi sipas saj Madhi nuk ka qenë pjesë e fushatës së PD-së dhe është angazhuar në mbështetje të Partisë Socialdemokrate gjatë zgjedhjeve, madje edhe si vëzhguese e saj gjatë numërimit të votave në Prrenjas.
Pra historia është tashmë e njohur: njëra palë flet për përjashtim, pala tjetër për pazare, ndërsa në PD fenomeni vazhdon të quhet me emrin e tij më të butë politik – “vetëpërjashtim”.
