Kandidatët e pavarur që synojnë të marrin pjesë në zgjedhjet e pjesshme të 9 nëntorit në pesë bashkitë pa kryetar duhet të mbledhin firma mbështetëse nga zgjedhësit e zonës përkatëse, si kusht për t’u regjistruar në garë.
Komisioneri Shtetëror i Zgjedhjeve, Ilirjan Celibashi, bëri të ditur se deri më tani nuk është paraqitur asnjë kandidat apo Komitet Nismëtar në KQZ për këtë qëllim. Ai u bëri thirrje kandidatëve të interesuar që të paraqiten për të marrë formularin e nevojshëm.
“Sipas Kodit Zgjedhor, kandidati i pavarur duhet të sigurojë mbështetjen e jo më pak se 1% të zgjedhësve të bashkisë përkatëse. Deri tani nuk kemi marrë asnjë kërkesë nga kandidatë apo Komitete Nismëtare për regjistrim”, deklaroi Celibashi.
Ndërkohë që kandidatët në bashkitë Mat, Cërrik, Berat, Vlorë dhe Tepelenë mund të nisin procesin e mbledhjes së firmave, situata në Tiranë mbetet e pezulluar. Pas vendimit të Gjykatës Kushtetuese, KQZ nuk mund të lëshojë formularët zyrtarë për kryeqytetin, çka pengon kandidatët e mundshëm të nisin procedurat.
“Në Tiranë, aktualisht askush nuk mund të mbledhë nënshkrime sipas formularit zyrtar, pasi KQZ nuk mund ta vendosë në dispozicion për shkak të vendimit të Kushtetueses”, sqaroi kreu i KQZ.
Ndërkohë, kandidatët e Partisë Socialiste për pesë bashkitë e tjera regjistrohen drejtpërdrejt në emër të partisë, pa pasur nevojë për mbledhje firmash.
Numri i firmave të nevojshme për secilën bashki:
• Tiranë: 7,200
• Vlorë: 1,719
• Berat: 822
• Cërrik: 388
• Mat: 291
• Tepelenë: 127
