Edi Rama ka uruar socialistët e Tiranës në një festë të vakët, ku festë ishte vetëm dielli i Ogerta Manastirliut, e vetmja socialiste e nivelit të parë që mori fjalën në takimin e fundit për këtë vit. Vetë kryeministri, i matur në urime dhe fjalë, ngriti dolli vetëm për vijën e dytë dhe të tretë të socialistëve, ndërsa vija e parë, mesa dukej edhe në videon e postuar prej tij në Facebook, as nuk ishte e ftuar.
Ndryshe nga vitet e tjera, që kur erdhën në qeveri socialistët kanë qenë të kursyer në festime. Përveç Blendi Gonxhes, që festoi me dajre dhe balerina, ministrat e tjerë nuk guxuan që, së paku publikisht, të shfaqen në festime, ndërsa kjo e sotmja ishte e vetmja ku Edi Rama mori pjesë personalisht.
Më shumë se festë, me gjasë Rama ishte prezent për të theksuar edhe njëherë “bekimin” e tij për kandidaturën e Ogerta Manastirliut për Bashkinë e Tiranës. Një bekim që duket i palëkundur, pavarësisht tërmeteve të njëpasnjëshme që po kalon mazhoranca socialiste.
