Adriatik Lapaj organizoi sot protestën e dytë kombëtare, duke e kthyer sheshin në një tribunë akuze të drejtpërdrejtë ndaj qeverisjes dhe asaj që ai e quajti “hajdutëri e institucionalizuar”. Në fjalën e tij, Lapaj deklaroi se kjo ishte dita e 28-të e qëndresës qytetare, një betejë që sipas tij nuk ka të bëjë me numra, por me drejtësinë dhe dinjitetin.
“Sot bota është më e lirë, sepse një diktator matanë oqeanit ra dhe një autokrat na ka përballë”, tha Lapaj, duke e vendosur protestën në një kontekst më të gjerë politik. Ai e cilësoi përballjen si një luftë të hapur me hajdutët, duke theksuar se edhe qëndrimi i vetëm i një qytetari është një akt i drejtë rezistence.
Në vijim, Lapaj ngriti një sërë pyetjesh retorike që godisnin drejtpërdrejt premtimet e pambajtura të pushtetit: ujin e pijshëm, rendin dhe ligjin, luftën kundër krimit, drogës dhe korrupsionit. “A kemi ujë sot? A kemi rend dhe ligj? A kemi sot krim dhe drogë?”, pyeti ai, duke shtuar se Shqipëria është shndërruar në një nga vendet më të korruptuara në Evropë. Në kulmin e fjalës së tij, Lapaj bëri thirrje për dorëheqjen e asaj që e cilësoi si figura më e korruptuar e qeverisjes.
Protesta u shoqërua edhe me fjalime të qytetarëve të ndryshëm, si dhe emigrantëve të ardhur nga jashtë, të cilët folën për largimin masiv, zhgënjimin dhe mungesën e shpresës që, sipas tyre, i ka detyruar të braktisin vendin. Dëshmitë e tyre i dhanë tubimit një dimension personal dhe emocional, duke reflektuar pakënaqësinë e akumuluar qytetare.
Pak para përfundimit të protestës, situata u tensionua. Adriatik Lapaj dhe një pjesë e mbështetësve të tij u përplasën fizikisht me forcat e rendit, pasi protestuesit pretenduan se persona civilë ishin afruar për të fotografuar pjesëmarrësit në protestë. Përplasja nisi me debate verbale dhe u përshkallëzua në shtyrje dhe përleshje, duke zgjatur për disa minuta, siç shihet edhe në pamjet video nga vendngjarja. Forcat e policisë ndërhynë për të vënë situatën nën kontroll, ndërsa turma u shpërnda gradualisht. Deri në këto momente nuk ka një njoftim zyrtar për persona të lënduar apo të shoqëruar.
Ndërkohë, mbështetësit e Shqipëria Bëhet ndërmorën edhe një veprim simbolik, duke vendosur një çadër më solide në vend të karriges që kishte shërbyer më herët si shenjë e qëndresës. Sipas tyre, ky veprim synon vijimësinë e protestës edhe në ditët në vazhdim, kur parashikohen reshje shiu, si dhe dërgimin e një mesazhi se qëndrimi qytetar nuk do të ndërpritet pavarësisht kushteve atmosferike.
Protesta e dytë kombëtare u mbyll kështu mes thirrjeve kundër korrupsionit, përplasjeve me policinë dhe sinjaleve se aksioni protestues do të vijojë.
