Ndërsa të enjten pritet të merret vendimi për kërkesën e SPAK për heqjen e imunitetit të Belinda Ballukut, Partia Socialiste ka bërë publike agjendën e mbledhjes së grupit parlamentar që do të zhvillohet në Pallatin e Brigadave, në Tiranë.
Sipas dokumentit zyrtar, mbledhja do të nisë në orën 11:00 me hapjen formale dhe fjalën e Kryeministrit dhe njëkohësisht Kryetarit të PSSH-së, Edi Rama.
Në rend dite parashikohen raportime të njëpasnjëshme nga anëtarët e kabinetit qeveritar, me diskutime të kufizuara në jo më shumë se dy minuta për çdo folës.
Do të raportojnë:
• Ministri i Financave, Petrit Malaj
• Ministrja e Shtetit dhe Kryenegociatorja, Majlinda Dhuka
• Ministrja e Ekonomisë dhe Inovacionit, Delina Ibrahimaj
• Ministrja e Shtetit për Administratën Publike dhe Antikorrupsionin, Adea Pirdeni
• Ministrja e Punëve të Brendshme, Albana Koçiu
• Ministri i Mbrojtjes, Piro Vengu
• Ministrja e Shëndetësisë dhe Mirëqenies Sociale, Evis Sala
• Ministrja e Arsimit, Mirela Kumbaro
• Ministri i Shtetit për Pushtetin Vendor, Ervin Demo
• Ministri i Drejtësisë, Besfort Lamallari
Mbledhja do të mbyllet me fjalën e kryetarit të grupit parlamentar të PS-së, Taulant Balla.
Në agjendën e publikuar nuk parashikohet asnjë fjalë apo raportim nga zëvendëskryeministrja dhe ministrja e Infrastrukturës, Belinda Balluku, pikërisht në prag të vendimmarrjes për imunitetin e saj.
Mungesa e saj në rendin e ditës vjen në një moment politikisht delikat, kur mazhoranca pritet të përcaktojë qëndrimin përballë kërkesës së Prokurorisë së Posaçme.
