Shpjegimi i Elisa Spiropalit ndaj kritikave të kryeministrit Edi Rama për Ministrinë për Europën dhe Punët e Jashtme rezultoi dukshëm më i gjatë se ironia e drejtpërdrejtë që Rama adresoi ndaj diplomacisë shqiptare. Si rrallëherë, ministrja doli në një konferencë për shtyp për të sqaruar publikisht funksionimin dhe nevojën për reformim të dikasterit që ajo drejton.
Spiropali pranoi se ekziston një kontradiktë mes respektit ndërkombëtar të Shqipërisë dhe problematikave të brendshme të shërbimit të jashtëm, duke u shprehur dakord me nevojën për reformë të ministrisë dhe trupës diplomatike. Ajo theksoi se në 100 ditët e para në krye të institucionit ka konstatuar ekspertizë të lartë brenda ministrisë, por edhe nevojën për ristrukturim.
Sipas saj, ligji i ri për shërbimin e jashtëm, që pritet të kalojë në Kuvend më 28 janar, synon të forcojë meritokracinë, promovimin e talenteve të reja dhe hapjen e diplomacisë për profesionistë me eksperiencë ndërkombëtare. Spiropali pranoi gjithashtu se gjatë viteve ministria ka vuajtur nga emërime, mungesë gradimi dhe vlerësimi për diplomatët me meritë, duke krijuar ngërçe të brendshme.
Deklarata e gjatë e ministres ishte qartas një përpjekje për të zbutur kritikën e Ramës, duke pranuar problemet e trashëguara, por duke këmbëngulur se diplomacia shqiptare ndodhet në një proces reformimi në funksion të negociatave me Bashkimin Europian.
