Protesta e opozitës u shoqërua me përplasje me policinë, por debati që pasoi nuk ishte për arsyet e protestës apo për përgjegjësitë politike. Ai u përqendrua tek një detaj shumë më teknik: lloji i spray-t që u përdor kundër protestuesve.
Policia publikoi foto të një bombole spray duke sqaruar se ky është mjeti që përdoret në ndërhyrjet ndaj turmave. Por reagimi i opozitës erdhi menjëherë. Sali Berisha deklaroi se ajo që policia paraqet si provë nuk përputhet me bombolën që shihet në duart e efektivëve në terren.
Sipas tij, nga një vëzhgim i kujdesshëm i fotos rezulton se mekanizmi i hedhjes së spray-t në dorën e policit është tipik për spray-t e përdorur për verbimin e arinjve, dhe jo për bombolat standarde që policia pretendon se përdor për kontrollin e turmave.
Berisha e cilësoi këtë një “mashtrim publik të ulët” dhe akuzoi policinë se po përpiqet të fshehë përdorimin e një mjeti të ndaluar ndaj njerëzve. Sipas tij, përdorimi i spray-t për arinj kundër protestuesve përbën një veprim me pasoja të rënda dhe në kundërshtim me konventat ndërkombëtare.
Kështu, ndërsa protestat zakonisht përfundojnë me debate për politikën, këtë herë skena u zhvendos në një analizë pothuajse laboratorike të një bombole spray: njëra palë thotë se është mjet standard policor, pala tjetër se është “verbues ariu”.
Në fund, mbetet për t’u parë nëse historia e protestës do të mbahet mend për kërkesat politike… apo për një debat të gjatë mbi mekanizmin e një spray-t.
