Paneli i Gridës mund të quhet burimi më i madh i informacionit mbi përmasën e pazarit dhe kaotizmit që ka pushtuar grupin parlamentar të PD.
Grupi i udhëhequr nga Gazment Bardhi dhe Flamur Noka i ngjan një mase interesash private, ku secili, me mediokritet, zbraz sa mundet paditurinë, delirin ose patetizmin e vet.
Dhe mbrëmë ndodhi diçka e ngjashme!
Kështu, Gazmend Bardhi u revoltua që i nxorrën në ekran një amendament të vetin, të depozituar për Ligjin e Paqes Fiskale. Dhe nxitoi të përcillte live “përgënjeshtrimin” (kështu e quajti) të amendamentit. Por dokumenti që nxorri nuk përgënjeshtronte faktin që ai kishte depozituar amendament. Dokumenti ishte thjesht rinovim i amendamentit.
Për të kuptuar amendamentin, me atë rast nuk ka nevojë fare ta lexojmë. Mjafton t’i referohemi historikut të rinovimit të qëndrimeve të Gazment Bardhit.
Madje as nuk ka nevojë të analizojmë se për cilin biznes punon zoti Bardhi sa herë firmos amendamente. Na mjafton të dimë që publikisht PD është shfaqur në parim kundër ligjit të Paqes Fiskale.
Pyetja është e thjeshtë: nëse PD është kundër ligjit të Paqes Fiskale, pse depoziton amendamente kryetari i grupit parlamentar?
Ose je kundër, ose je në parim pro dhe bën amendamente që ta përmirësosh projektligjin. Kjo është logjika e thjeshtë. Përndryshe, i bie që interesat ose injoranca të shtyjnë të bëhesh palë në një ligj që prek financat dhe milionat e kompanive.
Në këtë rast, edhe pse nuk përmendet, bëhet fjalë për Bankers, që zoti Bardhi e kupton por bën sikur nuk e kupton. Dhe zoti Noka nuk e kupton ose bën sikur e mbron.
Dhe për këtë, në fakt, s’ua ka fajin as Grida, as TCH.
Jo se janë engjëj.
Por sepse engjëj dhe djaj në këtë rast janë të gjithë me llogari bankare dhe zarfa tek biznesi i madh dhe bëjnë show sikur kanë merakun e popullit.
