PS dhe PD mundet të jenë të ndara nga revolucioni opozitar, por kur vjen fjala tek reforma territoriale duket se marrëdhënia është “gjalpë e mjaltë”. Të paktën këtë përshtypje të jepte takimi i zhvilluar sot në Lezhë me pjesëmarrjen e komisionit të posaçëm parlamentar të reformës territoriale, ku në krye të sallës Arbjan Mazniku dhe Luciano Boçi ishin krah më krah duke folur me drejtuesit lokalë dhe qytetarë për ndarjen e re territoriale.
Zhurma e seancave parlamentare këtë herë ia la vendin bisedës dhe problemeve konkrete të bashkive, ku madje deputeti i PD Gjin Gjoni u kujdes gjatë fjalës që të mos kishte asnjë keqkuptim me bashkëkryetarin Mazniku.
Në takim ishin pjesë edhe kryetari i bashkisë së Lezhës Pjerin Ndreu, Arbër Melyshi kryetar i bashkisë së Mirditës nga PD dhe Majlinda Cara kryetare e bashkisë Kurbin si dhe deputetë të tjerë të të dy forcave politike
Paqe në horizont? Ndoshta s’ka nevojë për fishekzjarre dhe molotovë, se kur flitet për çështjet e komunitetit ja që u gjeka gjuha e përbashkët.
