Në mesin e 12 finalistëve ndërkombëtarë që prezantojnë projektet për “Parkun e Besimit” në Petrelë, një hapësirë ku do të bashkëjetojnë të gjitha besimet fetare, vëmendjen këtë herë nuk e tërheq vetëm arkitektura apo koncepti urban. Ajo që të bën të ndalesh është prania në juri e një emri që përfaqëson një tjetër botë, por po aq frymëzuese: Nensi Dojaka, stilistja shqiptare që ka bërë histori në skenën ndërkombëtare të modës.
Krijuesja që fitoi “LVMH Prize” dhe ka veshur yje si Dua Lipa, Zendaya e Bella Hadid, gjendet sot në një tjetër rol – atë të një gjyqtareje që do të ndihmojë të përzgjidhet projekti që do të shndërrojë 210 mijë metra katrorë të luginës së Erzenit në një “faltore të jetës dhe natyrës”.
Pjesëmarrja e Nensi Dojakës në këtë proces është simbolike dhe domethënëse. Në një nismë që, sipas kryeministrit Edi Rama, nuk është “simbol feje, por faltore adhurimi ndaj jetës”, prania e një artisteje që ndërton gjuhën e saj përmes estetikës dhe ndjeshmërisë shpirtërore duket si ura ideale midis artit, identitetit dhe reflektimit njerëzor.
“Parku i Besimit” pritet të jetë një me hapësira reflektimi, evente kulturore dhe një “Muze Kujtese” për viktimat e persekutimit fetar. Por me Nensi Dojakën në juri, ai fiton diçka më shumë: një sens estetik që mund të shndërrojë “parkun shpirtëror” në një manifest të përbashkët mes natyrës, artit dhe njeriut.
Në një vend ku shpesh “projektet e mëdha” mbeten pa frymë, ndoshta ky është rasti i parë ku fryma është e garantuar — sepse aty, bashkë me pemët dhe tokën, do të mbillet edhe ndjeshmëria e një gruaje që ndërtoi suksesin e saj duke respektuar formën, heshtjen dhe shpirtin.
