Benet Beci ka gjetur një arsye krejtësisht banale për të zhvendosur memorialin në vendin ku dikur ndodhej busti i Enver Hoxhës në Shkodër. Denoncimi është bërë nga Sokol Drrasati, një prej shkodranëve antikomunistë dhe organizatorëve të hedhjes në erë të bustit të diktatorit.
Sipas Drrasatit, justifikimi i Becit lidhet me kërkesën e shoqatës “13 Dhjetori”, e cila paska propozuar që memoriali në nderim të asaj date të vendoset “diku tjetër”. Por dikush duhet t’i shpjegojë z. Beci se memoriali ka kuptim vetëm në vendin ku ka ndodhur ngjarja. Zhvendosja e tij e çon drejt humbjes së plotë të domethënies historike, jo vetëm për atë ditë të rëndësishme në historinë e qytetit, por edhe për kujtesën e epokës së komunizmit famëkeq në Shqipëri.
Të zhvendosësh memorialin do të thotë të zhvendosësh historinë. Dhe kjo nuk është çështje “propozimesh”, por respekti ndaj së vërtetës dhe kujtesës së Shkodrës.
