Kreu i PD-së, Sali Berisha, nuk duket se e ka seriozisht kundërshtimin për ndryshimet ligjore të propozuara nga socialistët, që pritet të votohen në Parlament.
Në deklaratën e sotme për mediat, Berisha, ndonëse e kritikoi iniciativën e socialistëve, nuk u shpreh i gatshëm që PD ta dërgojë në Gjykatën Kushtetuese ligjin që i ndalon gjykatat të pezullojnë kryeministrin, ministrat dhe disa funksione të larta shtetërore.
“A do të shkojë në Gjykatën Kushtetuese apo në kryengritjen paqësore, kjo do të diskutohet. Por ne jemi të përkushtuar në organizimin e kryengritjes paqësore të qytetarëve shqiptarë”, tha Berisha.
Ky është një tjetër rast kur kreu i PD-së është i paqartë në qëndrimet që po mban. Ai publikisht shprehet se “ndryshimet ligjore janë për të mbrojtur Edi Ramën dhe qeverinë e tij të korruptuar”, por nuk është i gatshëm ta kundërshtojë atë në rrugë ligjore.
Nëse vërtetë Berisha nuk do të dëshironte që këto ndryshime të mos miratohen, e vetmja që mund ta pengojë është Gjykata Kushtetuese. Për më tepër që kjo e fundit deri kur ligji të mbërrinte në zyrat e saj, do të jetë e plotësuar me 9 anëtarë, çka do ta bënte më të lehtë marrjen e vendimit.
Në mungesë të një arsyeje objektive për të bërë një veprim të tillë, kreu i PD lë të kuptohet se i shmanget seriozitetit të çështjes.
