Një debat për ndotjen e Bunës dhe Liqenit të Shkodrës ka prodhuar edhe një përplasje të re politike në Shkodër, këtë herë me tone ironike mes kryebashkiakut socialist Benet Beci dhe dy deputetëve të qarkut, Marjana Koçeku të PS-së dhe Kliti Hotit të PD-së.
Pas apelit të përbashkët të dy deputetëve për mbrojtjen e Bunës dhe Liqenit të Shkodrës, Beci reagoi publikisht duke lënë të kuptohet se shqetësimet e tyre janë më shumë për konsum mediatik sesa për probleme reale që nuk kanë marrë zgjidhje.
Kryebashkiaku i Shkodrës kujtoi se projekti për Impiantin e Trajtimit të Ujërave të Përdorura është tashmë i financuar nga Bashkimi Europian, qeveria gjermane dhe ajo zvicerane përmes KfW-së dhe ndodhet në fazën e prokurimit të punimeve.
Sipas Becit, projekti parashikon ndërtimin e impiantit modern të trajtimit të ujërave, rehabilitimin e stacionit kryesor të pompimit, ndërtimin e linjës kryesore të transmetimit dhe kalimin nëntokësor të tubacionit poshtë Bunës me teknologji mikro-tunelimi, sipas standardeve të Bashkimit Europian.
Por pjesa më politike e reagimit ishte ironia ndaj deputetëve, ku Beci deklaroi se “e mirëkupton dëshirën e deputetëve të rinj për të bërë lajm”, por shtoi se energjia e tyre do të ishte më e vlefshme nëse fokusohej tek problemet që ende nuk kanë marrë rrugë zgjidhjeje dhe jo tek projekte që, sipas tij, janë tashmë në proces konkret zbatimi.
