Në një kohë kur qytetarët shqiptarë përballen çdo ditë me radhë të gjata në spitale, mungesë ilaçesh dhe ankesa të vazhdueshme për korrupsion në sistemin shëndetësor, duket se prioritetet e ministres së Shëndetësisë, Evis Sala kanë marrë një drejtim tjetër, dhe është drejtësia.
Nga salla e Asamblesë së Përgjithshme të OKB, ministrja Sala foli për barazinë gjinore dhe aksesin e grave në drejtësi. Në njoftimin për mediat thuhet se ministrja e Shëndetësisë, foli për rëndësinë e ligjeve të forta, institucioneve të përgjegjshme dhe mekanizmave që ndihmojnë gratë dhe vajzat të kenë më shumë akses në sistemin e drejtësisë.
Natyrisht, barazia gjinore është një çështje serioze dhe e rëndësishme. Por për shumë qytetarë shqiptarë mbetet një pyetje e thjeshtë, a është kjo fusha ku duhet të përqendrohet një ministre e Shëndetësisë?
Sepse ndërsa në forumet ndërkombëtare flet për reforma në drejtësi dhe mekanizma ligjorë, në korridoret e spitaleve shqiptare realiteti vazhdon të jetë i zymtë. Pacientë që presin gjatë për vizita, mungesa medikamentesh dhe ankesa të vazhdueshme për mënyrën se si funksionon sistemi.
Ironia e situatës qëndron në faktin se problemet e shëndetësisë janë zgjidhur tashmë dhe ministrja ka gjetur kohë të merret me fusha që faktikisht u takojnë institucioneve të drejtësisë. Ndërkohë, për qytetarët që presin me orë në korridoret e spitaleve, prioritetet mund të duken disi më tokësore, një shërbim më i shpejtë, ilaçe të disponueshme dhe një sistem që funksionon pa “mik”.
Derisa kjo të ndodhë, qytetarët do të vazhdojnë të qëndrojnë në radhët e spitaleve, ndërsa Evis Sala do u flasi nga sallat ndërkombëtare se Shqipëria po bën përparime në fusha të tjera.
